政情：盧文端冇投票畀自己
全國政協常委盧文端成日笑容滿面，神態輕鬆，唔使問都知佢人緣好到極。早前我哋喺個酒會度見到盧文端，期間唔少人過嚟輪流恭喜佢，皆因佢做咗特首選委會政協界別「票王」，九十九位有權投票嘅政協選民之中，有九十三位都投咗佢一票。原來盧文端其實最少仲可以攞多一票，佢笑笑口話：「咪我自己嗰票囉！」因為佢冇投到票畀自己。
開票當日，外界都將焦點放喺特首參選人梁振英身上，唔多留意呢位新票王，之不過，心水清嘅老友梗係記喺心度，見到佢就第一時間送上祝賀。做咗政協十五年嘅盧文端好開心，多謝大家對佢嘅厚愛及支持咁話。
講起假期去邊度玩，盧文端逢親假期都會「一拖四」外遊，即係同埋老婆、外父、外母及細女Amanda把臂同遊。不過，幾個月前Amanda去咗英國讀書，嚟緊農曆新年唔會返嚟，餘下四位「團友」好唔慣，於是決定組團去英倫探佢，趁機去埋法國、意大利等地玩個十日、八日。