政情：泛民搞特首初選寒酸
泛民透過初選產生特首選舉候選人，係威係勢，但原來背後十分淒酸。最近泛民喺大專圈子發散晒搵人幫手做初選，人工唔低，十二粒鐘有五舊水，但最慘係要自攜可以wifi上網嘅電腦，畀選民投票，籌委會只會提供電話卡畀佢哋上網。究竟有無咁熱心嘅大專學生，真係要睇下回分解。
服務酬金五百蚊
當初民主黨公開話搞初選之時，信誓旦旦話資金唔係問題，又話泛民雖然唔多錢，但喺人流多嘅地方提供幾百部平板電腦畀市民投票，唔會有問題。點知早前民主動力出咗一個招聘廣告，話要招募工作人員，仲話因為今次係民主制度創建嘅歷程，所以大力推薦大家參加。廣告列出下月八日嘅工作詳情，當日服務時間係早上九點半至下午七點半，必須出席喺四號舉行嘅工作坊兩粒鐘，服務酬金五百蚊，但須自攜可以wifi上網嘅手提電腦或平板電腦。
其實呢類同政治關係咁密切嘅活動，肯去幫手嘅學生肯定係一腔熱血，人工幾多基本上都唔會在意嘅，不過今次要拎埋自己部電腦出嚟，仲要冒住失竊同埋故障嘅危險，招募活動反應會唔會真係咁理想，確實好令人懷疑。畀着係你，你介唔介意自己部電腦周街畀人係咁摸先？
除咗電腦呢個問題外，呢班幫手仲要有一個必要條件，就係要有好高嘅EQ，必要時仲要好打得。試想平時投票站就話有警察維持秩序，但當日嘅票站工作人員就要一腳踢，萬一人民力量或者社民連又派人示威同狙擊，又或者嗰班神神秘秘嘅愛護香港力量又出嚟抗議，幫手搞初選嘅人都要有能力應對至得。
我哋搵過泛民初選籌委會召集人鄭宇碩，佢大方承認係因為資金問題，所以要求工作人員自攜電腦。佢仲話，依家大部分後生仔都有電腦，相信要招募到足夠人手同電腦唔係問題喎。鄭宇碩仲特別強調，工作人員部電腦如果最終失竊或者畀人偷咗，籌委會一定會賠償，唔會要求對方承擔呢個風險咁話。
距離泛民初選預定日期仲有十一日，結果其實一啲都唔重要，最重要嘅係兩位參選人何俊仁同馮檢基都已經各取所需，達到拉抬自己同所屬政黨聲勢及選情嘅目的。