區議會選舉種票風暴，揭露咗選民登記原來係咁粗疏，所以公眾都好緊張其他選舉有無類似情況。而一千二百個選委選出後，尋日公眾正式可以去選舉事務處「查冊」，睇下呢班選委嘅常用地址有無古怪情況。但選舉事務處話根據法例，市民只可以「查閱」，唔可以用筆抄，亦唔可以影印。
其實好多同選舉有關嘅資料，例如選舉申報開支、選舉廣告等，普通市民都可以去選舉事務處「查冊」，仲可以抄低、影印，所以好多時候傳媒都係靠呢啲途徑，去揭發有無候選人漏報選舉開支等，但偏偏尋日開始畀公眾「查冊」嘅選委會當選人登記冊，就諸多限制。
選舉事務處回覆話，根據法例，由於登記冊內有選民地址，屬於個人私隱，所以只能用對眼望，連用筆抄低都唔得，但唔畀人抄，試問又點記得晒千二人住址呢？可以查但又要令查冊嘅人記唔清楚詳情，咁嘅安排，究竟為乜？真令人莫名其妙。