政情：何君堯吟詩寸發叔？
律師會會長何君堯（Junis）年初擊退鄉議局主席劉皇發，得到屯門鄉委會主席一職。Junis早排喺選委會選舉鄉議局界別中落敗，發叔事後「贈興」，話Junis得票已經唔低，極盡挖苦。有鄉議局中人爆料，話Junis早幾日突然傳咗一首詩畀班鄉紳，內容似乎係表達對發叔嘅不滿喎。
首詩係咁嘅：「勸君勿傷夕陽斜，正法弘揚鞭先知。寒冬有盡春無盡，溶了雪花見春花。」有鄉紳分析，Junis今次係憑詩寄意，將自己比喻為春天同春花，至於發叔就係日落西山嘅斜陽，同埋將融嘅雪花，似乎係要宣洩選委落敗嘅不滿喎。
Junis否認呢個分析，話冬天梗係要加啲詩情畫意，詩興大發同大家分享吓囉。佢話首詩只係想表達積極思維，只係互相鼓勵喎，佢仲希望大家諗嘢簡單啲，唔使咁複雜咁話。首詩內容想表達啲乜，真係只有Junis自己先知，不過外人點睇又係另一回事喇。