政情：特首辦聖誕片去煲呔化
俗語話獻醜不如藏拙，今次特首辦facebook就正正體驗到呢句說話嘅真理。特首辦喺facebook發出電子聖誕祝賀短片，內容講一個小朋友收到聖誕禮物嘅過程，寄語大家要珍惜身邊人。不過條片成分鐘，都搵唔到曾蔭權個樣，搞到好似同特首辦無乜關係咁。唔通煲呔曾已經撤離咗特首辦，只係大家唔知啫？
舊年亂rap遭惡搞
煲呔曾上年懶得意，諗住可以扮後生就同年輕人溝通到，於是同歌星MC Jin喺禮賓府拍短片，一路rap一路唱聖誕歌，佢自己就自high，但睇嘅人就覺得格格不入，條片仲畀網民寸爆話，做乜喺自己屋企都要着晒成套西裝慶祝聖誕節，最後網民仲惡搞成唔同版本。
今年唔知係煲呔曾有身邊智囊提醒，定係自己學精咗，自己唔再親身上陣做演員，條片只係影住一張白紙，不斷加上唔同顏色嘅油彩，最尾畫咗個小朋友，由唔開心到收到份禮物好開心，比喻為一個小小嘅關懷，已經令身邊人有窩心感覺。
可能連特首辦入面都知道煲呔曾大勢已去，得番幾個月任期，費時再搞埋晒啲個人崇拜，所以今次專登做到「去煲呔化」，總之煲呔曾個樣喺分幾鐘嘅短片入面，一秒都無出現過。同以往特首辦拍嘅片風格好唔同，如果唔講畀人聽，肯定無人估到呢條片係特首辦拍嘅，因為片入面無一樣嘢係同特首辦有關，似足中學生做嘅短片功課。
雖然條片無咩創意，入面嘅橋段亦好老土，睇完無乜深刻感覺，但唔知點解，一無煲呔曾個樣，成條片即刻順眼晒。而特首辦facebook嘅留言，以往一向係彈多過讚，但今次竟然受到挑剔嘅網民青睞，不但無咩人鬧，反而有幾十人like，網民「Jackey」仲話呢次係特首辦少有唔畀人插嘅貼文。睇嚟市民一見到煲呔曾個樣，就即刻火都嚟，換言之政府要得民心，「去煲呔化」呢個必勝方程式，似乎係不二法門喎。