政府信譽不保 明天唔知點好

好嘞，睇睇香港大學民意研究計劃嘅調查數字，十二月六至十三日成功以電話訪問過一千零五名香港巿民，發現巿民對特區政府嘅信任程度，再次跌至半年前嘅谷底。表示信任特區政府嘅比率只佔百分之三十五，暴跌九個百分點。

對香港嘅前途又有幾多信心呢？巿民對香港嘅前途信心比率雖然維持正面，不過下跌至○三年十月嘅低位，現時信任淨值係正百分之十八。至於一國兩制咯喎，巿民嘅信心雖然正面，比率係五成二，但就明顯下跌至○四年六月嘅低位。

因乜事幹市民對一國兩制嘅信心會跌得咁交關？調查機構係咁講嘅，估計與區議會選舉懷疑種票有關，另外就係未來特首爭霸戰帶來影響。

其實計功夫茶話齋，特區政府就好比一個曾經犯罪嘅釋囚，好人好姐梗係唔會投以信任目光啦。呢嗱嗱嗱，記唔記得席捲全城嘅僭建風暴呀？新界鄉紳僭建成風仲可以理解為傳統陋習啫，勢估唔到一眾高官都係知法犯法嘅罪人，副局長又僭建，局長又僭建，連曾蔭權祖屋都被揭發違規建築。喺咁嘅情況之下，信你公正不阿依法治港都係傻瓜啦！

仲有仲有，香港嘅核心價值本來係言論自由同新聞自由，點不知一場港大保安風波搞到滿城風雨，維護國家政要嘅「核心保安」居然凌駕核心價值，你話政府仲點信得過？更加無稽嘅係警隊一哥曾偉雄發表白日見鬼嘅「黑影論」同「卡手論」，令到市民信心動搖。

講番種票疑雲吖，呢家嘢可大可小，隨時動搖香港嘅法治根基。鬼鬼祟祟走去種票嘅當然可惡，負責監管嘅選舉委員會同樣可憎。如果本地官僚無法杜絕舞弊行為，萬一將來普選產生嘅特首居然係一個出錢買票嘅人渣，香港一定玩完。

巿民對香港嘅前途信心比率下跌至○三年十月嘅低位，呢家嘢好鬼死大鑊啫。事關○三年發生沙士瘟疫，可以講係香港回歸以來最黑暗嘅日子，今時今日居然出現同沙士之時差不多嘅信心低位，證明曾蔭權政府衰過老董舊時。

特首參選人唐英年嘅競選口號話喎，明天在你我。計功夫茶話齋，政府信譽不保，明天唔知點好。無論未來特首係乜水，一旦得唔到市民信任，結果好大可能係衰過煲呔舊時！