有「民主阿婆」之稱嘅前政務司司長陳方安生，尋日循例喺聖誕前舉行傳媒聚會，繼續就香港政事指指點點，令人不期然想起一句諺語：「百足之蟲，死而不僵」。民主阿婆尋日點咗幾個現任高官嘅名，話無論邊個做特首都好，都可以考慮吓畀呢班人做問責官員喎。佢又唔係特首，究竟關佢乜事？
有幸畀民主阿婆點中嘅，包括發展局局長林鄭月娥、運輸及房屋局局長鄭汝樺、商務及經濟發展局常秘黃灝玄、財經事務及庫務局常秘區璟智，同埋民政事務局常秘楊立門，佢話呢幾位高官經驗同能力都一等一，如果佢哋願意嘅話，下屆冇理由唔搵佢哋做喎。
對於兩位特首參選人梁振英同唐英年，民主阿婆起初唔肯評論，不過之後又借人把口，話的士司機覺得邊個好啲，又話自己喺行政會議同其中一人合作多年，知道佢嘅表現。佢又忍唔住再插煲呔曾，話問責制全面失敗，做嘢方法令佢心痛等。其實民主阿婆已經係一粒舊電池，呢啲嘢都與佢無關喇。