政情：勞顧會代表威脅退隊
勞顧會六名勞方代表早前停止審批補充勞工計劃，更聯同三名勞工界立法會議員一齊向政府施壓，最終成功令入境處加設申報機制，加強審批監察。據聞，有船廠之前想輸入船身燒焊工，曾經申請補充勞工計劃但被勞顧會拒絕，最近船廠想向入境處打主意，入境處為免風頭火勢下再添火頭，叫船廠再向勞工處申請，勞顧會班委員正（目及）實呢宗個案。
勞工界嘅三加六機制一向團結兼立場一致，咁多年嚟合作無間，今次呢單嘢亦係一個好例子。不過，勞顧會勞方代表中有一名政府委任嘅委員鄭啟明，唔知係受到政府壓力定係其他原因，上個禮拜突然向其他五名委員發出訊息，話唔該大家喺一個禮拜內搞掂件事，否則自己會先行恢復審批，甚至退出三加六機制咁話。
其他委員收到訊息嚇咗一跳，以為政府從中作梗分化勞工界，點知原來係鄭啟明不滿早前選委會選舉中被其他勞工界跣咗一鑊，搞到落選，加上覺得做咗咁多年都無被三加六重視，所以先搞單咁嘅嘢出嚟。