政情：卿姐慰問孫公一肚氣
教育局局長孫公孫明揚又再病倒，本身患有腎衰竭嘅佢，日前因為肺炎送入瑪麗醫院，但到底佢入住咗邊間病房，竟然成為高度機密。民主黨副主席劉慧卿諗住聊表心意，前晚一聽聞孫公入院，即刻向孫公送上慰問花籃一個，點知醫院方面懶神秘，連送花員想擺低個花籃喺病房門外都唔得，卿姐嬲得滯，叫送花員將個花籃丟落垃圾桶算數。
孫公今次入院，住咗喺成人深切治療部，官方前晚唔肯確認。今年內相繼有前商務及經濟發展局局長劉吳惠蘭、中央政策組首席顧問劉兆佳同埋政務司司長林瑞麟入院，佢哋嘅病況透明度太低，一直備受批評。
今次孫公入院，當局都係收收埋埋。卿姐尋日好（慶）咁話，醫院方面點都唔肯話畀送花員知孫公住喺邊，搞到送花員想擺低個花籃都唔得，真係有啲不近人情，卿姐谷住道氣，索性叫送花員揼咗個花籃算數，不過卿姐嘅心意，相信孫公收到嘅。