政情：博愛捐百二萬聽嶽曲
食物及衞生局局長周一嶽日前喺東華籌款活動上獻唱，一首粵語歌《忘不了你》畀佢唱到走音兼甩嘴，網民笑到碌地。尋日佢再揸起支咪，喺博愛醫院舉辦嘅慈善餐舞會上，獻唱英文歌，台下觀眾都聽到一額汗。
上次周一鑊唱歌失準，真係令人忘不了，尋晚周一鑊再上台，台下嘉賓都為佢抹一額汗。博愛主席團為表支持，即揼六十萬贊助佢獻唱。短短一首歌，每句都萬萬聲，可能就係因為咁，令到周一鑊好有壓力，唱《The Twelve of Never》時，有幾句歌詞尾音都收得唔靚。
唱完一曲，台下觀眾好識做，拍爛手掌之餘，仲係咁叫encore，博愛主席團決定再捐六十萬，支持周一鑊唱多首羅賓漢主題曲《Everything I Do》。有主人家同觀眾嘅支持，周一鑊似乎打咗支強心針，愈唱愈淡定，最後都算過關，不過不失啦。