政情：翟紹唐力爭監警會升呢
唔經唔覺，監警會做咗法定機構已經有兩年，同警隊最新鮮滾熱辣嘅一仗，梗係今年八月國務院副總理李克強訪港期間收到嘅十幾單投訴啦，事實上，今年經監警會審核嘅個案逼近四千大關，比以往多好多，要擺放大量投訴文件、口供紀錄唔在講，加上請多咗十幾個審查人員，地方自然唔夠用，早排先至喺同一座大廈嘅廿六樓租多咗半層頂住先。
監警會主席翟紹唐尋日同傳媒講，原來監警會同社福機構待遇一樣，都係一筆過撥款，多畀嘅租金可能要自己用儲備啃埋。但小數怕長計，據知，監警會依家嘅會址係灣仔告士打道一幢商廈嘅十樓，嗰頭啲租金閒閒哋都要三十幾蚊一呎，監警會租層半樓合共一萬呎，每個月嘅租金就要成三十零萬，認真襟計。
捱貴租擬自置物業
翟主席就話，與其每個月納貴租，不如睇吓政府仲有邊啲地方有吉位，但又驚畀人話唔夠獨立，所以有諗過學吓平等機會委員會咁，自置物業，一嚟唔使每個月咁重皮，二嚟唔使由十樓「遊（車立）河」上廿六樓咁麻煩，大前提係要鄰近灣仔警察總部，事關佢哋成日都要過去開會，但依家寫字樓價格未有回落迹象，加上要向政府攞錢，睇嚟都要一段長時間。
唔單只要諗辦公室夠唔夠用，笑言從未打過工嘅翟主席仲話，要睇埋監警會同警隊代表嘅對等問題，佢話，依家監警會秘書長個位係D2（首長級薪級表第二級），等同警隊嘅助理處長，但警隊依家嚟開會最高級嗰個係監管處處長，職級係D4（首長級薪級表第四級）。
咁又係，警隊向來講究階級觀念，而監警會係用嚟監察警隊，如果開會嗰陣，對家職位高過自己，好難談判，點都講唔通，所以要將秘書長嗰位同警隊睇齊，都係可以理解嘅。據了解，黃福鑫做警監會（監警會前身）主席嗰個年代，曾經研究過全面檢討部門嘅人事職級，但到最後都係無疾而終，今次由魄力十足嘅翟主席出面，同政府可能有得傾噃！