中環出更：陳漢平推介台腸配蒜片
已到咗歎大閘蟹嘅季尾，城中名人愛幫襯嘅銅鑼灣華記永昌號，最近換裝推銷台灣特色食品。華記旗下門市幾乎已成為台灣食品專賣店，人氣食品過百種。太子爺陳漢平（Brian）同卓妮講，佢至愛台灣香腸，無論送飯或當零食都一樣咁滋味，仲話遲啲打算推廣台灣人食香腸配蒜片嘅文化添！
阿叻秀姑為舖頭常客
日前台灣駐港機構台北貿易中心舉行台灣美食推廣活動，Brian都喺度，講起台灣食品如數家珍，仲話經常落舖頭攞啲台灣香腸返屋企做餸。幫襯華記嘅城中名人無數，好似「叻哥」陳百祥同埋黃杏秀就經常喺舖頭掃貨。Brian話，佢哋發現有咩好食嘅台灣食品，會提供情報等華記去入貨。
同場仲有添安產品總經理黃義明，最近佢睇中港人鍾意歎鮑魚嘅龐大市場，引入台灣加工嘅即食南非溏心鮑魚，不過為咗迎合港人口味，連做鮑汁嘅豉油都特登喺香港運過去，認真專業。
