政情：彭太梅姐上身義唱籌款
國際婦女會日前喺文化中心舉行粵曲慈善籌款晚會，唔少嘉賓好友慷慨解囊，為屬下嘅老人中心籌得逾一百三十萬善款。主席彭徐美雲雖然唔識唱粵曲，當晚依然落力獻唱《抱緊眼前人》、《胭脂扣》等經典時代曲，仿似「阿梅」梅艷芳上身。油尖旺民政事務專員郭黃穎琦罕有地穿上露肩長裙，客串獻唱粵曲，為晚會籌得十萬元。
彭徐美雲有老公彭曉明同囝囝彭穎生（Victor）現身支持，非常溫馨。該會嘅已故創會主席徐余梅韾係彭太媽媽，依家到佢接棒，佢坦言好大壓力，不過自小受媽媽耳濡目染，做善事已經變成日常生活嘅一部分。
卓妮見彭生打條棗紅色Lanvin呔好靚，原來係彭太親自挑選，彭生甜笑咁話，自己從來唔使買呔，因為老婆好清楚乜嘢呔啱自己心水，難得佢哋結婚三十周年，恩愛依然。
該會副主席徐守然原來係Victor表姐，做印刷產品生意嘅佢幾忙都好，都會抽時間幫手搞活動，因為佢自細就跟姑姐同嫲嫲去做交流同探訪，覺得好有意義。
白韞六多顧慮 唔急抱孫
前消防處處長盧振雄伉儷、前入境處處長白韞六伉儷、前懲教處處長單日堅伉儷都有嚟湊熱鬧，佢哋紛紛變身小粉絲，原來白太同盧太平時都有跟婦女會去長者中心義唱粵曲。下年係龍年，潮流興生龍B，白韞六剛於去年娶新抱，反而覺得生龍B唔好，太多人同期生仔，到時入醫院逼人，報入學又難，都係順其自然啦。