特首參選人唐英年原定喺本月一日舉行造勢大會，點知前一日遇上花園街大火，佢話考慮到災民心情悲慟，所以將大會押後到尋日舉行，點知尋日佢個造勢大會喺下晝舉行，早上又傳嚟北韓領導人金正日死訊。有人話，佢會唔會又感到好沉痛，將個造勢會再度押後呢？
真係邪，點解佢舉行造勢會嘅兩個日子，都發生不祥事件？唐唐尋日就回應話：「全世界都好多事發生，呢件只係其中一樣。」
本報向著名風水顧問李丞責請教，佢話金正日病逝係同上星期嘅月全食有關，事關所有日食、月食現象喺風水學上嚟講，都係唔好嘅現象，特別係不利國家領導人嘅健康。而尋日同月全食剛好相隔一周，所以對唐唐嘅運勢冇大影響。之但係香港位處東南，明年將坐正三煞位，好大機會出現政局變動同天災人禍，明年五月仲遇上「日環食」大凶兆，所以無論下屆特首由邊個出任，七月一日上任後，都肯定要面對好嚴峻嘅挑戰。