政情:周一鑊搵宿敵撐自己

立法會審議緊《二○一一年漁業保護(修訂)條例草案》,主要係規管香港捕魚業,措施包括要求本地漁船登記、限制新漁船加入、限制非漁船捕魚同埋設立漁業保護區等。

民建聯立法會議員黃容根已經做足準備,同負責呢條草案嘅食物及衞生局局長周一嶽死過,根哥請黨友民建聯主席譚耀宗做草案委員會主席,方便自己自由發言。

周一鑊呢鑊仲唔知驚,決定搵人同譚耀宗爭做主席,左揀右揀,佢惟有硬着頭皮請張宇人出山。張宇人夠晒義氣,日前已經盡力為自己拉票。於是雙方進入鬥多人階段,喺加入草案委員會期限完結前,根哥再搵嚟黨友陳克勤加入,而張宇人黨友方剛同專業會議議員石禮謙亦有報名,令戰況相當激烈。

其實張宇人同周一鑊係宿敵,最近嘅就有一滴香事件,不過政壇變化萬千,關係時有變化。事件最終結果係點,今日選主席後就會揭曉。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!