政情:金民豪派迪園定心丸

凡事都有好同壞兩面,有時睇你點睇件事,或者講嘢時可以避重就輕,迪士尼樂園度假區行政總裁金民豪就做咗個示範,試圖轉移視線,不過是否接受,睇你點睇。

迪士尼樂園機動設施不時發生故障,不過金民豪就調轉嚟講,佢話樂園設施運作可靠度達九成九,維修人員會每日檢查設施,每年亦由海外專家檢查,遇有事故會在十五分鐘內通報機電工程署,包括遊戲設施未能及時疏導人流離開等小問題。佢又話,螺絲等機械配件不會重複使用以確保安全,單以過山車計算,每年已更換約一萬粒螺絲。

一萬粒螺絲有無將你嚇窒?可靠度九成九,又會否令你覺得樂園好可靠?或者你咁諗:我一年都去唔到一次迪士尼,咁啱就遇上壞車,所以對我嚟講,壞車率就高達百分之百。金總裁會否理解作為旅客嘅感受,將可靠度達九成九,提升至一百個巴仙?

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!