政情：工記靠風車陣撼鼠王芬
明年立法會選舉首次有五個超級區議會議席，工聯會（工記）領導層早已打晒開口牌，話希望以區議會超級議席產生「風車效應」帶動五區選情，但眾所周知，工記目前喺港島區同九西冇議席，其中一旦喺九西派人出選，將與○八年獲工記支持嘅專業會議梁美芬（鼠王芬）短兵相接。據聞鼠王芬最近幾年靜靜起革命壯大地區勢力，睇嚟工記要落戶九西嘅如意算盤未必咁順利，難免要同鼠王芬事前有一番龍爭虎鬥。
○八年鼠王芬參選立法會選舉前，佢率先參選○七年區議會，喺九龍城黃埔東勝出打響頭炮，其後佢成立西九新動力，網羅獨立區議員加盟，加上獲得工記當時發信予會員推薦支持，最終力壓當時代表自由黨參選嘅田北辰，成功取得九西最後一席，田北辰之後決定轉區，去新界西扎根。
不過三年多過後，鼠王芬喺替補機制曾發表「選民懲罰論」，惹來軒然大波，工記內部即時心郁郁想派人參選九西取而代之，但鼠王芬亦非省油的燈，除咗盛傳有中聯辦九龍工作部部長林武力挺外，據聞暗地裏亦扶植多名親兵參選剛過去嘅區議會。
地區實力有差距
就以油尖旺為例，「雙黃」黃頌同黃建新首度參選就雙雙勝出，至於女將韋海英就喺深水埗南山、大坑東同大坑西選區一舉擊敗民協譚國僑，由委任轉直選嘅陳鏡秋亦成功落戶李鄭屋，連同○八年拍檔參選嘅地區地膽繼續喺地區穩打穩紮，鼠王芬嘅地區實力相信有增無減，相反真正以工記旗號喺九西成功當選嘅區議員真係寥寥可數。
工記已非首次表態想落戶九西，究竟工記今次能否成功落戶就要端視工記領導層有幾堅持喇。工記開行大風車，都未必吹得走鼠王芬。除非工記嘅大計只不過係要保持個風車繼續轉，而唔在意係咪要五區贏晒喇，因為喺九西，其實建制派只係夠票產生一個議席，同鼠王芬真係有你無我o架。