中環耳目：鄧鉅明三代同堂歎星級滬菜
位於尖沙咀馬可孛羅香港酒店嘅米芝蓮二星級食肆夜上海，係唔少城中老饕嘅私人飯堂，好似太子珠寶鐘錶主席鄧鉅明（Jimmy），全家都係夜上海嘅擁躉。上周四午膳時間，Jimmy一家人喺度開餐提早賀聖誕，席上仲有好少亮相嘅媽媽鄧老太。Jimmy咁孝順又聽老婆話，抵佢愈嚟愈發達。
當日現身嘅有Jimmy太太鄧宣宏雁（Emily）、三家姐及七家姐朱鄧麗萍、姐夫朱繼陶，仲有遠道由昆明來港探親嘅外母及舅仔，Jimmy大仔及返港度假嘅二仔都喺度，三代同堂好熱鬧。鄧老太高齡九十歲仍然好精靈，打麻雀十幾小時都冇問題。
老婆（目及）實 冇得「偷食」
Jimmy對餐廳美食如數家珍，唔使睇餐牌都可以叫到成枱餸，包括鹹肉豆腐煮津白、椒鹽小黃魚及素菜包等，碟碟都係佢至愛。Emily就好欣賞清炒河蝦仁，盛讚淋上醋汁味道一流。Jimmy曾經笑稱，最鍾意趁老婆唔喺度時，到夜上海偷食甜品，當日老婆大人喺度，佢一啖都唔掂，認真聽話，不過就猛推介畀人試。明年初Emily將加入太子珠寶做執行董事，幫手睇住盤生意，到時Jimmy更加難「偷食」喇！