旅遊發展局主席田北俊錫孫錫到燶係人都知，其實佢仲好錫屋企嗰四隻愛犬。
尋日田少喺社交網站Facebook上傳咗佢周末同愛犬嘅合照，相中嘅佢玩到連褸都除埋，佢話難得啲狗仔肯坐定定，梗係要即刻影番張相留念，真係童心未泯。
田少本來養咗三隻狗仔，但係隨住時間飛逝，狗仔都變成老狗，仔女同孫仔都建議佢搵番個新嘅「家庭成員」，於是佢就喺香港救狗之家領養咗隻九個月大、狼狗同唐狗混種嘅狗女Mini，Mini好快就同大狗們打成一片。田少曾經講過，今個聖誕因為要陪孫仔而唔去外遊，睇嚟佢湊住孫仔同四隻愛犬，已經係最大嘅娛樂喇。