特首選舉在北京發功下，風雲色變，有人痛心疾首，有人一味喪笑詭辯，唔通扮豬真係可以食老虎？有人棄選，「過票」給誰又惹來多番猜測；小圈子遊戲，大多數市民與老朽一樣，多係冇份玩，是以關心多啲嘅係：禽流感又殺到！香港已不是一個安全城市！外匯基金上季蝕到阿媽都唔認得……
聖誕將到年關又逼近，老朽只係關心夕陽政府會唔會乘機閂水喉，連粒糖都大條道理唔派？講真，豬狼是否對決，真正關心的不會太多，反而未來日子，通脹如虎，小市民更需要詩意的滋潤和祝福；鄰埠政府就深明此道，是以，錢派完一次又一次，福利又加碼，對老人家更特別有心，即使寒冬，有雪落着，都係落在幸福的土地，有北風呼呼，心裏有着暖意，也就不怕冷！
講番特首選舉，今趟特別熱鬧，皆因有太多人言獸語，博客上有則段子給老朽的啟示——無論如何，真相是存在的，只是人們很難看到，或者找不到值得信任的證據。結果：不是有了真相以後人們才相信，而是讓人們相信了，它就成為了真相。
特首選舉無論淪為狼或豬，一個人的身體，自己作不了主人，喜怒哀樂都受制於人，甚麼「君子之爭」全是騙人的。老朽旁觀者清，玩這遊戲如果有誰行為上太道德，他就會活得很辛苦；當然若有誰敢嘴上不道德，他就會活得很狼狽。老朽阿媽早逝，死前教我：做人，不以兩頭擺為先，而以盡心為要。揸住呢句話老朽至今活得自在快樂。