兩名特首參選人梁振英同唐英年嘅部分團隊成員已浮出水面，仲出盡法寶助選吶喊助威，唔知係咪港府想保持政治中立定係拍得罪未來老闆，尋日公布委任公務員薪俸及服務條件常務委員會委員時，都唔敢偏幫任何一方。梁營嘅市建局主席張震遠及唐營嘅總商會代表林健鋒（Jeffrey），再度獲委任至明年底，但最弔詭嘅係張震遠嘅任期由明年四月一日先開始，但Jeffrey就由明年一月一日開始。
公務員事務局發言人話，之前已接獲張震遠書面申請請假，由上個月底至明年三月二十五日，暫時停止履行港府委任嘅公職，由於當局尊重張震遠所以先有如此決定喎。咁就奇嘞，張震遠原本任期到本月三十一日止，莫非佢早就預知當局會再委任佢？就當佢早一個月知道獲委任，但點解政府唔到時先至宣布委任呢？莫非公務員事務局局長俞宗怡唔知中間會有三個月真空期？究竟當局此舉係咪多此一舉，呢個留番畀大家判斷喇。