政情：暴動累林煥光英文攞D
皇仁書院尋日舉行畢業禮，作為舊生嘅平等機會委員會主席林煥光（WK）就返母校擔任頒獎嘉賓。WK話，雖然佢喺皇仁只係讀咗兩年書，但覺得呢段時間係佢讀書生涯最值得紀念嘅時光，事關當年會考期間撞正六七暴動，佢喺皇仁考緊英文科時，遇上成班示威者喺學校外叫囂，搞到佢唔可以集中精神考試，最後英文科只係得個D級。
WK話，當時佢去咗好多間港島名校叩門，但間間都唔肯收佢讀中六，搞到好灰心，好彩最後皇仁有個位剩，令佢有得後補入讀，而且仲讀到理科班添！WK憶述，當年喺皇仁最大嘅得着係遇到兩位好老師，佢哋會帶成班同學去大會堂睇展覽，又教佢哋中國古典詩歌，十足依家嘅通識教育科，但依家因為工作忙已好少同兩位良師聯絡。
問WK睇好邊個會做下屆特首，佢就笑笑口話留番畀其他人講喎。又問佢會唔會幫下屆政府做嘢，WK就耍手擰頭咁話唔關佢事，謙稱自己粒電池差唔多用完喎。