教育局副局長陳維安上周五硬闖財務委員會，要求撥款逾四百七十二億元畀教資會，作八大院校未來三個學年嘅使費同注資落研究基金，議員要佢答應未來三年大學不能加學費，但點知唔識變通嘅陳維安點都唔肯應承，結果被議員否決，最終又係要上司教育局局長孫明揚（孫公）幫佢執手尾。
立法會否決撥款後，孫公曾搵過啲立法會議員講數，話政府應承未來一年唔加學費，後兩年就視乎檢討結果而定，但依家連檢討都未開始，到檢討完成後，都唔會影響到後兩年嘅學費啦！言下之意咪係未來三年大學都唔會加學費囉，唔明陳維安點解咁硬頸。
有議員相信，孫公已經就事件「省」過陳維安，事關佢向孫公投訴陳維安唔識變通時，孫公亦表現出一副心照不宣嘅模樣。
其實陳維安搞課本及教材分拆已爛尾收場，又係要孫公執手尾，依家連申請大學撥款都搞到衰收尾，反映副局長同政治助理制度無助培育政治人才，而且弄巧反拙，增加咗正印局長嘅負擔至真。