政情：港台作反重溫倒米金句

「聲音檔案選舉」投票期由尋日開始至廿七日，市民可以上網聽吓同參加投票，但我哋就先聽為快，翻查二十個候選聲音檔案，發現最矚目嘅係「三曾、雙英、一鼠」上榜，其中「三曾」倒米金句已經佔咗四分一。就以煲呔曾為例，佢喺十月出席立法會答問大會時，突然向人民力量黃毓民發表「爛仔論」，被批評唔尊重議員外，更惹來全城嘩然。

鼠王芬「懲罰論」網民喊打

至於煲呔曾嘅哎吔細佬鬍鬚曾亦榜上有名，佢發表「史上最廢」嘅財政預算案向市民嘅強積金注資六千蚊，最終搞到要向市民派發六千蚊平息眾怒。同樣姓曾嘅警務處處長曾偉雄，曾就國家領導人訪港嘅保安安排備受質疑，阻礙傳媒採訪，被問及點解有警員阻擋記者鏡頭時爆出「黑影卡手論」，將記者當成黑影，即時成為全港傳媒嘅公敵。

「雙英」唐唐同CY亦係發表惹火言論嘅表表者，前者嘅「垃圾論」令民望隨即直線插水，後者嘅「蠢人特首論」則擺明寸爆被形容為「豬」嘅唐唐。值得一提嘅係，立法會議員「鼠王芬」梁美芬曾經發表嘅「選民懲罰論」亦都上榜，當時被網民窮追猛打，搞到鼠王芬要縮埋避風頭，所以點少得佢嗰份吖。究竟最終邊個嘅倒米金句可以金榜題名，呢個就留番畀市民慢慢揀喇！