中環出更：龐愛蘭進修保心境年輕
香港管理專業協會（HKMA）尋日成立校友會，請來校友、沙田區議員龐愛蘭（Scarlett）喺就職典禮中演講。沙紙多到數唔晒嘅Scarlett話，自己多年來堅持進修，原因係媽媽嘅一句話：「乜嘢都有機會失去，惟有知識冇人可以攞走」。佢大學醫科畢業後做咗幾年嘢，驚覺學識太少，於是繼續進修中醫藥、領導及資訊科技等課程，最近修讀嘅博士課程更取得優等成績添。
孫大倫重視身教
不過，Scarlett坦言好討厭考試，因為寫長論文唔畀用電腦，三小時內寫到手軟，但讀書又令佢好有滿足感，佢仲話讀書會令自己與時俱進，心境更年輕，腦筋都靈活啲添。
講到讀書心得，HKMA副主席、富士攝影器材主席孫大倫（Dennis）話，最好有志同道合嘅戰友一齊溫書，互相鞭策。至於點樣督促兩個囝囝讀書，佢話講乜都冇用，一定要身教，同囝囝一齊學習。Dennis讀藥劑出身，佢話呢科係佢嘅興趣，雖然冇學以致用，但依家年紀大咗，有機會都想接觸番，唔知同佢公司轉型出護膚產品有冇關係呢？
尋晚就職典禮仲舉辦咗個葡萄酒及朱古力品嘗工作坊，Dennis自言愛飲法國布根地葡萄酒，但只係閒時飲，冇大量收藏。Scarlett就最愛食白朱古力，但佢話從來唔會計較卡路里，想食就食，秘訣係適可而止，難怪身材fit到漏喇。