中環出更：父贈百萬鑽錶 羅詠詩靚絕聖誕P
最近聖誕派對停不了，城中名媛靚女都悉心打扮歡度佳節。卓妮日前喺香港青年聯會嘅聖誕派對上，見到賢慧社主席羅詠詩（Anthea）戴住最新款Cartier限量版Feline百萬鑽錶，靚絕全場。原來隻腕錶係Anthea爸爸贈送嘅聖誕禮物，犒賞愛女經營精品酒店有功，難怪Anthea笑得甜絲絲。
營運精品酒店有聲有色
Anthea係名副其實嘅叻女，佢原本係財經界專業人士，後來加入父親創辦嘅萬通集團出任董事，短短時間就做出一番成績。去年佢睇好遊客對本港酒店嘅需求強勁，大膽購入油麻地砵蘭街一樓盤，斥資二千萬元裝修後，全新嘅精品酒店「M酒店」投入營運，至今剛滿一周年，無論入住率或房價都比預期中理想。
難得爸爸送大禮，Anthea就睇中Cartier最新推出只供VIP客戶訂購嘅高級珠寶腕錶，於是透過任職卡地亞高級珠寶總監嘅好姐妹、賢慧社副主席林玉茵代訂，一到手就急不及待戴上，開心到不得了。
咪睇Anthea外形嬌柔，其實胸懷壯志，最近佢又重手出擊，斥資一億元買入灣仔慶雲街一個地盤，打算重建為一幢有七十八間房嘅精品酒店，小妮子嘅事業心不可小覷。
卓妮