如果有個不可一世嘅富家子弟同你講：「我屋企好靚㗎，簡直靚到冠絕全城，又夠大喎，又夠豪喎，室內裝修美輪美奐，室外更加鳥語花香，唯一缺點係樓宇結構唔係咁安全之嘛！」你會有乜嘢感想？你可能對呢一個富家子弟嗤之以鼻：「妖！死開啦，一幢危樓都好意思攞嚟炫富！」
冇錯，室雅何須大，花香不在多，家居環境最緊要安全。與其住危樓，不如住狗竇，相信連蝸居一族都唔會反對。
有一家嘢非常之咁令人痛心疾首，就係自稱國際大都會嘅香港，豪華裝修係就係靚到沊一聲，居然唔係一座安全城市！
呢嗱嗱嗱，睇睇中國城市競爭力研究會公布嘅結果吖。綜合各個城市嘅經濟、社會、環境以及文化四方面指標計算，香港依然係中國今年最具綜合競爭力嘅城市，其次係上海、北京、深圳同埋廣州。研究顯示，香港雖然面對內地城市競爭，但傳統優勢依然存在，人才、商務環境以及社會環境仍比內地優勝。
研究人員筆鋒一轉，轉出一個驚心動魄嘅名次順序。中國最安全城市排行榜之中，香港跌出前三十強之列，簡單咁講即係不入流。喂，乜都第一嘅香港，原來唔係咁安全㗎咋，你話係咪醜死怪呀！
研究機構解釋，剛剛發生嘅旺角花園街奪命四級火，造成九死多人傷，反映香港排檔同舊樓維修管理欠完善。仲有仲有，香港黑社會問題時有發生，刀光劍影自然有損安全，希望港府改善。
所以話啫，香港就好似一個不可一世嘅富家子弟，家居環境表面上非常之咁風光，實際上危機四伏。淨係睇番花園街大火吖，火燒連環檔已經唔係第一次，相關部門居然冇吸取教訓積極改善消防措施，終於火光熊熊燒到生靈塗炭。即使中國城市競爭力研究會冇提到，不過香港人都記得土瓜灣馬頭圍道今年亦發生過一宗類似悲劇，一場大火燒到唐樓劏房死傷枕藉。再追溯遠少少，同一個土瓜灣，同一條馬頭圍道，砰砰磅磅，死人冧樓。
香港安全排名跌出全國前三十位，老實講一句，確係夠羞家，而且極度令人擔憂。既然曾蔭權識得向兩間電力公司表示大幅加價係不可接受，呼籲中電同港燈負起社會責任，咁功夫茶就要向曾蔭權嚴正聲明，香港咁唔安全係完完全全不可接受，呼籲煲呔臨收工都要負起社會責任，千祈唔好企圖拍拍屁股走人。
你知啦，「示威者」剛剛成為美國《時代》雜誌風雲人物，若然香港繼續危危乎，話唔定風雲人物日日拜候禮賓府！