兩電只要一息尚存，一定忘不了賺到盡！對住一個無能政府，既然佢提供一個足以鑽空子嘅方案，唔巧取豪奪點對得住資本主義社會？兩電一息尚存，忘不了獅子開大口，鬼咩！無能政府保障佢哋利潤水平，又保障佢哋壟斷地位，唔狂加電費，點對得住政府嘅照顧？
兩電加價，理據混亂，其中一個理由係煤價成本上升。查實今年下半年國際煤價已顯著下滑，來年煤價易跌難升，兩電明年煤價成本毫無壓力，加價理由毫不充分。
兩電一息尚存，忘不了狂加價，固然惹起全城怒火！之不過，老朽更扯火嘅係煲呔曾喺社交網站扮熱血戰士為民請命，左一句不可接受，右一句社會責任！大佬啊，只要老朽一息尚存，聽咗都打晒冷震！
兩電之所以獅子開大口，明明係你哋班無能高官○八年訂立管制協議時放生佢哋，為今日狂加電費埋下禍根，始作俑者就係弱雞政府，家陣煲呔曾又出嚟發噏風幾句，扮到成個大俠咁，關公上身，好心慳啲喇，煲呔曾自己廢柴，就當市民係文盲，冇常識？
賣市民豬仔又扮正義，都話煲呔曾縮骨治港，佢一息尚存，都忘不了重複上演拿手好戲縮骨神功！佢一日存在，老朽雖「早知世界由心造，無奈悲歡觸緒來」！
呢個世界，固然要有真正能人、精英、大師，否則世界就冇咗靈魂；但亦要有各式廢柴官僚，否則世上會失去討伐對象，煲呔曾一息尚存，我忘不了對佢口誅筆伐！