政情：馬天惠善用卡特教誨
美國前總統卡特日前旋風式訪港出席多個場合。先施百貨後人、崇德社公關主席馬天惠（Esther）就有份喺一個名為「與總統對話」嘅活動中擔任司儀。Esther話喺當日嘅答問環節中，有人想知道今年已經八十七歲嘅前總統，如何保持六十多年嘅婚姻仍舊恩愛如昔？原來卡特總統話夫妻之間有乜拗撬，必定要將問題喺瞓覺前解決，避免問題發酵同惡化。其實除咗夫妻關係，小如同事間嘅相處，大至處理國家大事，道理都係一樣，秘訣就係：立即解決。
Esther係典型嘅事業型女性，近日除咗招待卡特及日常工作，過幾日就要飛去北京出席一個表揚女性企業家嘅頒獎禮，可謂忙碌到不知人間何世。然而Esther行經蘭桂坊，一個巨型廣告牌映入眼簾，上面寫咗兩句歌詞，腦中隨即響起聖誕歌曲嘅旋律，才驚覺聖誕節就快到啦，佢至記起仲未買禮物，Esther話唔可以畀呢個問題擴大，要立即抽時間搞搞佢。