政情：議員助理示威求加薪
政務司司長林瑞麟做政制及內地事務局局長期間留低一大堆「種票」炸彈，點知佢又死好彩，啲炸彈等到佢升咗官先嚟爆，不過尋日一大班議員助理就話要搵佢算帳，執番唐英年手尾喎，真係佢都有今日﹗
其實喺一班尊貴嘅立法會議員背後，都有一班議員助理，幫佢哋睇文件、做研究、寫講稿等，仲要做埋大大小小嘅地區工作，不過，呢班助理嘅人工就因為受政府撥款機制影響，好少有得加人工，好多嘅起薪點仲只得七千幾蚊，加上議員任期一完佢地就無得撈，所以流失率好大，好多平均做一至三個月就離職。
呢班喺幕後默默耕耘嘅議員助理，尋日擔正做主角示威，將過百個跨政黨議員助理嘅聯署交畀政府，聽佢哋講，其實年初立法會議員酬金及工作開支償還款額小組已經向立法會議員及政治委任制度官員薪津獨立委員會提交意見書，希望喺本年十月實施建議。
行政署至今無作出回應，佢哋今日會再約見行政署長，希望佢哋爭取成功啦﹗