政情：阿人留新西掟走張超雄
選舉嘅嘢，往往要部署一段時間，絕對唔係一時三刻搞得掂。好似後日宣布成立嘅工黨，已經要為下年立法會選舉頭痛，疑似黨主席李卓人自從區選失利後，一直盤算出邊區。最近阿人初步敲定，決定留守新界西，即係變相要黨友張超雄空降新界東。但係泛民喺新界東已經插咗好多支旗，張超雄呢個社工界「長毛」要贏立法會，真係過五關斬六將都未夠。
今次工黨叫超雄轉戰新界東，無非都係保住阿人個位，因為阿人好有可能做工黨主席，一旦連立法會都輸埋，個黨散都似，所以揀番去老巢新界西，都係想安全系數高啲。
阿人好老實咁話，之前曾經有諗過轉戰新界東，但自己喺新界西天水圍選區議會輸咗，唔想畀人有「選輸咗就轉區」嘅感覺，所以留守新界西嘅機會大好多。
萬一阿人留守新界西，○八年同樣出戰新界西嘅超雄，為免重疊票源，惟有被迫轉區，而工黨內部有一講法，認為超雄嘅社工專業背景，可以吸納唔少專業票，正好新界東有呢類背景嘅候選人唔多，來來去去得個大律師，所以有一定市場喎。
新東爭崩頭贏面低
不過心水清嘅人就知，新界東下年雖然加到九席，但淨係泛民已經爭崩頭，現任嘅社民連長毛、公民黨大狀、民主黨劉慧卿同黃成智一定爭取連任，有興趣加入戰場仲有新民主同盟，數到呢度仲未計建制派，所以新界東議席多，但偏偏係競爭最激烈嘅戰場。超雄呢次就算唔係送死，都係一場贏面甚低嘅硬仗。
工黨喺立法會選情陰霾重重，但無阻組黨進度，近期仲有新血加入，例如中文大學學生會前會長黎恩灝，就有機會做工黨執委，佢上年因為護送民主女神像入中文大學而聲名大噪，依家做緊民陣召集人，將來絕對有潛力出選。
學者方面工黨都有兩個，一個係浸大政治及國際關係系助理教授黃偉國，另一個係港大通識教育部領袖培育課程副主任梁啟智，兩人都齊齊當選選委，證明工黨喺高教界都有一定勢力。