中環出更：東華社企Cafe香草味撲鼻
添馬公園對開塊草地，齋畀人瞓又唔畀人瞌埋眼，認真殘忍，幸好草地隔籬開咗間社企餐廳，令呢塊門常開草地有番啲人性。呢間社企Cafe唔止賣咖啡，午餐時仲有輕便意粉供應，每道菜都加上自家秘製香草醬，令餐廳唔止人性化，仲充滿芬芳撲鼻嘅香草味，吸引到唔少公務員幫襯。
呢間餐廳叫「i Bakery cafe」，係東華三院新成立嘅社企餐廳，以商業模式運作，同時有一半員工係殘疾人士，我哋查過喇，佢哋嘅員工時薪都有三十蚊一個鐘，算係相當唔錯。雖然係社企，但唔代表食物差，師傅堅持不用現成醬料，每日親手切碎新鮮香草，再配以秘方調製，令每一啖意粉都充滿濃郁香草味。
店中以輕食為主，另一主打就係鮮牛油無添加曲奇，咬落「格」一聲咁鬆化，令唔少公務員忙裏偷閒，都要嚟呢度飲吓咖啡，歎個tea。