聖誕節乜嘢最吸引？梗係聖誕老人喇。平安夜一覺瞓醒有禮物收，直頭開心到暈。聖誕禮物講心唔講金，禮輕情重吖嘛。不過世事無絕對，今時今日收聖誕禮物，可能要先講「金」o架。
千祈咪會錯意，講緊嘅唔係真金白銀，而係後果可能會好甘嘅重金屬。因為紅襪入面嘅禮物，可能係危及健康嘅無形殺手。不過，送禮變靠害絕對唔關聖誕老人事，係政府失職所致。
有環保組織測試咗市面上超過五十件聖誕禮物嘅重金屬含量，樣本包括手機吊飾、小飾物、相架、銀包等，全部都係聖誕送禮最熱門選擇。測試結果嚇你一跳，大約四成樣本含鉛量超過美國安全標準，其他有毒重金屬例如鋅及鎘嘅含量亦同樣超標。其中一款耳環嘅含鉛量竟然高達百分之九，問你驚未！
係人都知，如果有毒重金屬喺體內積聚，會導致多種疾病。好似鉛咁，屬已知神經毒素，根本唔應該喺人體內存在；而鎘就會造成肺損傷、腎衰竭同高血壓等。重金屬亦會導致不育同埋影響兒童腦部發育。呢類物質接觸時間愈長，中招風險愈大。好似手機吊飾、銀包咁，使用者一日接觸無數次，風險之高，可想而知。
小小禮物暗藏安全大隱患，弊在政府一直詐傻扮懵，不監不管，根本唔當一回事。環保組織狠批本港法例對消費者保障嚴重不足。家陣話就話有消費品安全條例監管商品嘅化學成分，原來有關條例只係得個空殼，入面竟然連具法律效力嘅安全標準都欠奉。就好似獵人支槍冇裝子彈咁，連空槍都打唔響，仲打乜鬼獵吖。
查實，除咗聖誕禮物重金屬超標冇監管，市面嘅兒童玩具及用品亦暗藏「殺機」。呢，環保組織前排喺本港測試咗一百件兒童用品，入面有二十三件含有至少一種重金屬，其中一款卡通筆袋嘅含鉛量，超出歐美標準十六倍。
最離譜嘅係，本港重金屬監管形同虛設，空氣污染指標同樣落後於人，甚至比第三世界地區更低。好似空氣質素指標咁，依家仲用緊二十幾年前實施嘅「老皇曆」。即使當局迫於公眾壓力，將可吸入懸浮微細粒子PM2.5列入檢測範圍，但建議使用嘅標準，比國際標準高出幾倍，簡直係攞市民嘅健康較飛。
明知法例甩甩漏漏，安全隱患防不勝防，當局居然翹埋雙手當冇事。計功夫茶話齋，旨意跛腳鴨政府保障市民健康同安全，簡直係嘥氣，不如得閒去沙田車公廟上多炷香好過。