中環出更：饒宗頤 掌天下第一名社
人稱「潮州之寶」嘅國學大師饒宗頤，退而不休，嚟緊又有新任務，本周五將執掌有天下第一名社之稱嘅「杭州西泠印社」，擔任第七任社長。潮屬社團總會主席許學之尋日率先送上恭賀。饒老千金饒清芬話，爸爸已九十五歲，但每天堅持學新嘢，好精靈。
西泠印社 清朝創立
港人或對「西泠」較陌生，該社係創立於清朝，距今有逾百年歷史，西泠被譽為內地著名藝術團體，擁有出版社、中國印學博學館及篆刻創作研究室等，學術地位崇高。饒老近年深居簡出，今次破例出任社長，西泠認真有面子。城中「潮州冷」都覺得顏面有光，紛紛致電恭賀饒老。
許學之尋日宴請一眾來港嘅西泠印社核心成員食飯，饒清芬同老公鄧偉雄齊撐場，原來鄧生係饒宗頤學術館藝術統籌主任，同外父志趣相投。佢話，饒老對獲委任興奮不已，但有感自己年事已高，西泠具體事務，要同仁合力幫手先至得。