歐債危機持續，本港中小企及廠家面臨困境，工業界立法會議員林大輝尋日就質詢政府可否重推「特別信貸保證計劃」、考慮畀更多中小企暫緩預繳利得稅，以紓緩佢哋嘅融資困難。點知商務及經濟發展局局長蘇錦樑（Greg蘇）就交行貨話，目前已有措施幫中小企，又不斷重複話當局會「適時」推出更強硬嘅措施幫業界，結果被議員圍攻，猛追問咩時候先叫「適時」。
大輝質問Greg蘇，係咪要去到「銀行無錢借，中小企執晒笠」，政府先肯出招呢？點知Greg蘇就教番大輝轉頭，話經濟措施係好立體嘅，然後又重複一次話目前已經有好多措施幫中小企，搞到大輝扯晒火，話自己好似雞同鴨講，唔知究竟局長係詞不達意定係漠視中小企，淨係知局長全程遊花園讀稿喎！
最後連專業會議石禮謙同旅遊界謝偉俊都加入追問戰團，但Greg蘇就好少理，死都唔肯正面回應問題，搞到代主席自由黨劉健儀都冇晒符，叫議員喺其他場合先再問局長喎！