政情：理大校慶請嘉賓頭痕
香港大學百周年校慶典禮請咗國家領導人出席，點知因為學生示威同典禮安排搞到一鑊泡，令喜事變壞事，港大自此蒙上污點。前車可鑑，明年輪到理工大學七十五周年校慶，面對一連串慶祝活動，校長唐偉章都變得好謹慎，當被問到會否邀請國家領導人撐場時，佢就話仲未落實嘉賓名單，叫大家唔好咁心急，畀啲時間佢哋籌備喎。
唐偉章尋日同傳媒聚會時，除咗講吓明年校慶籌備事宜外，仲話理大咁多年培育咗好多社會才俊，所以佢明年會馬不停蹄四圍飛，穿梭內地、英美等地，同唔同校友見面，當然唔少得揼吓大家心口幫理大籌款啦！唐校長話，以往一年大約可以籌到一億元，但明年就會推出一千萬一個嘅講座教授冠名，希望趁校慶吸引各界多多支持，希望為大學籌得更多資源。