政情：梁志仁駐台唔知做乜？
香港駐台灣嘅香港經濟貿易文化辦事處下星期就會運作，辦事處主任梁志仁（John）等一行八人今日就會赴台。雖然話係去做開荒牛，但佢一啲都唔介意，除咗因為升職外，最主要係佢太太係台灣人，可以同親友團聚真係一舉兩得。不過，依家貿發局同旅發局喺台灣都有辦事處，呢個台灣姑爺去到台灣可以做啲乜，連佢自己都講唔清楚。
阿John之前喺財經事務及庫務局任副秘書長，以前都被派駐過日內瓦，所以駐外地可謂駕輕就熟，除咗喺法國留學嘅大仔外，佢會帶埋太太同十四歲嘅細女一齊過台灣。辦事處暫時喺台北地標101大樓辦公，但永久會址仲物色緊，估計明年三月開幕。辦事處仲會喺台灣請多七個人，每年營運開支要二千萬港元。
不過，問到阿John辦事處主要職責係乜，佢就淨係識話促進兩地經貿文化合作，真係講咗等於冇講，莫非納稅人嘅血汗錢就係咁fing咗去？