政情：醉爆局長自薦唱粵曲
夕陽政府中，歌喉唔錯嘅除咗有民政事務局常秘楊立門外，政制及內地事務局局長譚志源（Raymond）都有番咁上下，前日佢同民建聯立法會議員食飯時喪飲茅台，搞到飲大咗，提出要幫民記去紅館開騷，而表演嘅唔係流行曲，而係粵曲！尋日Raymond諗番轉頭，先至知道自己飲大咗兼講大咗。
Raymond喺○八年加入問責團隊後無耐，曾經喺電台節目上表演盧冠廷嘅《失戀的海盜》，平心而論，佢歌喉唔算太差。尋日佢自爆前晚可能受茅台影響，席間忽然提出，要喺明年六月民記慶祝活動上，同民政事務局副局長許曉暉合唱粵曲。民記見有高官肯做義工，多啲嚟密啲手，立即爽快答應。
Raymond唱流行曲就掂啫，但粵曲唔知得唔得，加上許曉暉唱開大戲，同台演出真係相形見絀，睇嚟佢要密集式特訓吓先得喇！話時話，Raymond照計點都唔會差得過食物及衞生局局長周一鑊唱《忘不了你》咁嚇人啩？