本港尋日有兩個展覽開鑼，一個係工展會，另一個係首屆內地高等教育展，兩個一樣咁旺場。不過，逛工展會個個滿載而歸，睇教育展唔少人失望而回。
等功夫茶講少少背景資料先。話說早排北大人送「大禮」，內地部分高等院校試行免試招收香港學生。呢次高等教育展就係由六十三間參與計劃嘅內地大學，為本港學生同家長提供學系及學科簡介、學習費用同收生要求等等升學資料。
港府教育高官話喎，有關措施可以為本港學生提供另一個升學途徑，亦有助佢哋日後喺內地同香港發展。咦，聽落的確前景無限，點解會失望而回呢？原來內地大學要求比想像中高得多，想入讀著名學府，難度分分鐘高過考本港名牌大學。
話時話吖，免試升學唔係免費試食。呢次內地院校收生要求同本港大學一樣，都係「三、三、二、二」，文憑試中英文科達到三級，通識及數學科達到二級。問題係，免試升學表面睇係陽關道，其實更似獨木橋。
因為學額有限，本港學生要同內地尖子學生競爭，難度可想而知。雖然今次內地大學提供約三千個學額，但北大、清華、上海交大呢啲名校，學額只得十個到幾十個不等。僧多粥少，一定爭崩頭。
好似北大咁，最低入學要求係六科四級或以上。唔怪得有本港學生話，內地好嘅大學門檻仲高過香港嘅大學，壓力更大，要快啲返去溫書。
講真，心存僥倖以為北上升學實掂，係對實際情況一知半解嘅井蛙之見。家陣內地大學生好多都基礎紮實，學業成績同競爭力比起港生一啲都唔輸蝕。佢哋目標清晰，求知欲強，學習認真，成績突出，唔似好多香港學生咁，練精學懶，未學知識先學ＨＥＡ。
有調查發現，唔少僱主認為本港大學生工作欠主動，令人失望，寧願請喺本港讀書嘅內地大學生。經濟一體化大環境下，企業需要具國際視野同競爭力嘅人才，本港學生自己唔爭氣，點同人哋揮吖？
都係古人講得啱，養不教，父之過，教唔掂，官之墮。冇錯，係「官之墮」，本港教育政策五時花六時變，教改愈改愈亂，唔止學生慘變白老鼠，教師水平亦每況愈下。早排當局公布教師基準試評核報告，「肥佬」多不在話下，普通話科課堂語言測試，竟然英文、廣東話統統出齊，咁嘅師資，根本就係誤人子弟。港府仲大大聲話要發展教育產業，打造區域教育樞紐，唔好玩喇！
本港生競爭力不如內地生，優勢愈來愈少，連免試北上升學咁好嘅機會都無辦法把握，計功夫茶話齋，就算北大人肯出手相助，香港自己都要爭氣，搞好教育至係正路㗎！