區議會選舉開支申報尋日截止，我哋先後已寫過多名候選人嘅選舉開支申報，好似有候選人以五萬幾蚊換來七十七票，每票成本高達六百幾蚊。相反，有候選人因為自動當選，所以唔使使錢都可以輕鬆取得議席，例如元朗屏山北嘅鄧慶業就一毫子都無用過，同區廈村參選嘅鄧家良、錦田參選嘅鄧卓然亦都只係用三十蚊影咗疊個人相，所以用得錢多唔代表一定會贏嘅。
另外，喺黃大仙龍趣選區自動當選嘅黃金池同翠竹及鵬程選區嘅蘇錫堅，亦都只係用咗三百幾蚊，主要係用來印製多謝選民支持嘅海報。至於喺尖沙咀東選區參選、外號「加利仔」嘅Ahuja Monesh Gopaldas，雖然佢喺區選以不足五百票落敗，但佢只係用咗六十五蚊，平均每票成本毫幾子，名副其實刀仔鋸大樹。雖然申報選舉開支尋日截止，但由於候選人可以用郵寄方式交表，所以暫時仲未知有無人遲交。