政情：KK選特首倒15萬落海
一向主張「又傾又砌」嘅民協立法會議員馮檢基（KK），日前宣布參加特首選舉，但就點都唔肯講會否參加泛民主派嘅特首初選，又話機制有漏洞、對啲泛民選委候選人好失望。尋日佢終於諗通，話會參與初選，仲話預咗十五萬元經費玩初選添。不過，無論KK參選為乜，都係一定輸梗，等於倒錢落海。
KK解釋，十五萬元經費係來自大學同學、選舉顧問團同中小企負責人。十五萬元對其他參選人嚟講當然係小事啦，但對以基層工作為主嘅民協，唔算小數目。好多人都知，KK係冇機會勝出嘅，就連勝出泛民初選都唔樂觀，所以話佢嗰十五萬元凍過水真係冇講錯。
泛民點解要參加小圈子選舉，坊間各有解讀。好似KK咁，已經唔只一次畀人質疑佢只係博曝光，希望多啲見報同上電視，為明年立法會選舉造勢，如果屬實，花十五萬元當做宣傳又唔算貴，當然佢本人就矢口否認啦！