政情：唐唐行工展 食撻唔知價
工展會尋日喺維園開幕，呢個由廠商會主辦嘅活動愈來愈旺場，無他嘅，因為小市民生活愈來愈艱難，夕陽政府又無能，惟有自求多福去執平嘢。兩位特首選舉參選人梁振英（CY）同唐英年，尋日都有去工展會做騷，CY未到開幕禮就急急腳快閃，雖然冇同唐唐正面交鋒，但唐唐唱獨腳戲都出事，就係食蛋撻唔知價，反映佢對物價完全唔掌握。
兩百蚊買一打普通蛋撻
唐唐出席完工展會開幕後想急急離開，根本冇打算參觀任何攤位，但其中一檔賣鉸剪嘅攤位為咗吸引唐唐，一早就安排廿幾個職員企定定向佢打招呼，唐唐於是笑笑口行埋去同啲職員合照，似足拉票造勢咁款。問佢點解咁多檔唔去，偏要去呢檔，唐唐就緊張急急解釋，話因為見到啲職員好團結喎。可能佢為免招人口實，臨出會場時，特登去多一檔賣蛋撻嘅攤位。
唐唐同蛋撻檔職員打招呼之餘，仲買咗一打蛋撻添。不過，唐唐畀錢時，就攞咗兩張「紅衫魚」出嚟，不斷重複要負責人收錢，仲猛話唔可以平賣畀佢喎，點知職員接過兩張一百蚊紙後就呆一呆，結果要找番一百四十蚊畀佢，即係每打蛋撻六十蚊，賣五蚊一個。唐唐食撻唔知價，可能因為平時食開啲貴價蛋撻，但比起好多基層市民用四十蚊食一日，呢個場面都幾發人深省。
至於唐唐嘅勁敵CY就來去匆匆，只係留咗一陣同啲廠商會成員傾偈，答咗幾條問題後就迅速閃人。當然啦，廠商會係唐唐嘅票倉已係公開秘密，CY今次可以講係深入敵陣，走得快係可以理解嘅。另外，等收工嘅煲呔曾一如往年拖埋老婆去工展會掃貨，仲大手筆使咗二千幾蚊買嘢。今年已經係煲呔曾最後一年以官員身份主持工展會開幕，如果佢明年再去工展會嘅話，已變回平民身份，冇人得閒再招呼佢。