中環出更：玩具博物館 回味那些年
香港作為世界第二大玩具出口地，但就冇一間正式嘅玩具博物館，難怪玩具協會榮譽主席黃鐵城早前都話希望香港快啲整番間。有見及此，協會聯同玩具廠商會及貿易發展局等，合辦一個跨越百年歷來最大型、為期三個月嘅玩具博物館展覽，將於周五開鑼。協會主席丁煒章（Bernie）坦言好期待，因為可以緬懷一下兒時嘅玩具回憶。
搜羅千件「香港製造」
Bernie話，自己細個好鍾意經典電影《星球大戰》，屋企本來都儲咗一套模型，但已經唔見咗，所以好想喺今次展覽回味一番。佢又話，今次展覽將搜羅約一千件不同年代香港製造嘅玩具，當中不乏上世紀玩具嘅雛形同自製玩具，亦匯聚本地學生、本地及海外藝術家嘅無限創意和創造。
對於時下兒童較為內向被動，家有八歲囝囝嘅Bernie話，會盡量畀囝囝玩教育性強嘅玩具，好似大富翁、飛行棋咁，鍛煉佢嘅思維，促進人與人之間嘅互動交流。協會副主席湯誠正教仔都有一套，盡量唔畀仔女喺三歲之前睇電視同用電子產品，以免影響佢哋身心嘅平衡發展喎。
玩具廠商會常務副會長楊子江話，玩具係香港嘅文化產業，結合咗創意藝術同歷史文明，好值得向公眾展示，借此機會對香港玩具業「溫故知新」。
該展覽獲創意香港資助，於本月十六日至明年三月十九日期間，於將軍澳嘅香港知專設計學院免費開放畀公眾參觀。
卓妮