政情：盛品儒公器私用亞姐助選
特首選舉委員會選舉如箭在弦，各界別候選人各出奇謀積極拉票。參選資訊科技界別選委嘅亞視執董盛品儒，尋日「公器私用」搵嚟五個亞姐到科學園做人肉布景板宣傳造勢，但反而佢自己甩底無到，由其中三個亞姐做代表幫佢派單張，而另外兩個亞姐就義助另一位候選人吳傑莊派單張拉票。
尋日上午一班亞姐去到科學園，落力起勢向途人派發盛品儒嘅候選人宣傳單，但就唔見佢本人出現。班亞姐都好識執生，話盛生要開會行唔開，又話自己係出於義務性質幫盛生拉票喎，分毫不收，仲讚盛生靚仔人緣好，自然多人幫喎。由於係義務性質，所以唔會計入選舉經費。
盛品儒甩底，反而吳傑莊就有現身拉票，但佢啲宣傳品嘅顏色同設計同盛品儒好相似，有兩個亞姐仲幫佢派單張添！吳傑莊笑笑口話係撞啱啫，佢哋兩個咁老友，心有靈犀唔出奇，強調自己係獨立候選人，絕對冇聯票成分喎。