政情:周總退休難忘車廂縱火案

港鐵行政總裁周松崗做埋月底就退休,明年一月起由前紐約大都會運輸局主席韋達誠接任,港鐵尋晚就喺跑馬地馬場廂房搞咗場榮休兼履新酒會,好多城中名人都畀面撐場。周總話,任內最難忘就係上任初期遇上嘅金鐘站車廂縱火案及兩鐵合併。

帶接班人入馬場「行善」

周總又話,一切工作完成後,可以鬆一口氣,退休後要好好享受人生,但最重要係多啲陪老婆去飲茶喎,因為以前連飲茶撐枱腳嘅時間都冇。至於候任行政總裁韋達誠,擁有六呎六吋高佬身形,作為港鐵新人嘅佢,話好多謝周總嘅幫忙,畀咗好多專業嘅意見佢,好似帶佢去馬場賭馬,教佢輸咗唔使傷心,因為可以做善事喎!

除咗周總退休外,消費者委員會尋日亦公布,總幹事劉燕卿將於明年十月一日開始退休前休假,而繼任人則由跨國人事顧問公司進行全球招聘,並由已成立嘅遴選委員會建議人選。消委會主席張炳良向劉燕卿一直喺消委會嘅出色工作致敬。

「Money18免費即秒股票報價網站」現推出8升級功能,財經資訊,實時實發!