中環出更：仁濟盆菜宴 寒流夜暖笠笠
踏入十二月，盆菜宴紛紛出爐，繼保良局盆菜宴後，仁濟醫院日前又喺荃灣沙咀道球場筵開六百八十席，場面墟冚，搞到要由元朗三間食肆合力供應。理文造紙太子爺李文斌（Edmond）以仁濟醫院主席身份拖埋太太Amanda現身，佢話太太係第一次食盆菜，感覺好新鮮喎。
為「重建基金」籌款
當晚天文台發出寒冷天氣警告，令盆菜宴更添氣氛。Edmond話，盆菜宴係為「重建基金」籌款，去年已籌得一百五十萬元嘅好成績，今年再接再厲創佳績。總理王賢訊（Vincent）同太太Vincci就帶埋三個月大嘅BB女去湊熱鬧，Vincent笑稱，好在BB女似媽咪咁精靈，如果似佢細個一碌木咁就弊喇。
卓妮仲見到總理馮卓能，佢同荃灣鄉事委員會主席鍾偉平都係今次活動嘅靈魂人物。鍾偉平話希望透過活動，讓公眾知道仁濟醫院嘅重建工程，繼而踴躍捐輸，令仁濟進一步提升服務。據講，當晚盆菜落足料，每盆都有半隻鵝、滷水豬、雞件、魚蛋等食材，令大家過咗一個暖笠笠嘅晚上。