中環出更：泰水災要蛙人打救 蒙德揚頭痕
日本駐港總領事館尋日為日皇誕辰舉行慶祝酒會，唔少同日本有生意往來嘅政商界名人都有出席，當然唔少得賣日本貨賣到開巷嘅信興集團副主席蒙德揚（David）啦。David話，日本地震對佢盤生意影響唔大，令佢最頭痕嘅，反而係早前泰國水災，仲搞到要出動蛙人「救命」添！
David話，旗下公司銷售嘅日本家電用品，大部分廠房設喺泰國，所以日本地震都唔夠泰國水災影響咁大。佢話有啲廠房水浸浸到蓋過頭，好多機器都浸壞晒，損失慘重，幸好啲模具仲用得着，搞到要搵潛水員潛落水底搵番啲模具，認真大工程。問佢點睇地震後嘅日本，佢話唔去東北區咪得囉，總之佢日本米照食，大阪照去，就算有輻射，咪當照吓肺囉！
太子珠寶鐘錶執董朱繼陶就同卓妮講，全球嘅手錶錶芯主要產自瑞士、日本同中國，前排日本地震令錶芯停產，錶價被炒高，貴到亂晒龍，好在依家復產後價格回落。自由黨副主席周梁淑怡都係日本迷，最愛去關西大阪，鍾意當地嗰度充滿本土風情，而且每次去親都要狂掃一隻當地先有售嘅潔面粉。
王愛倫識唱日本兒歌
前港姐趙雅芝同王愛倫（Ellen）以慧妍雅集成員身份出席活動，佢哋曾經喺日本地震後捐款賑災。佢哋異口同聲話，好鍾意買日本化妝品、珍珠同服裝，而Ellen媽媽係日本人，但佢就唔係好識講日文，淨係識唱日本兒歌，係兒時媽媽教佢唱嘅。
大會為來賓提供和牛、草餅等日本特色小食，仲安排喺日本大地震中受影響最深嘅岩手、宮城及福島三個縣設置「東北攤位」，並由日本柔道館館長岩見武夫即席示範日本手打年糕，令嘉賓大開眼界。