政情：青聯上電視分享抱負
香港青年聯會一班成員好多都係富二代，可能外界有觀感覺得佢哋淨係識飲飲食食同歎世界，青聯嚟緊會上一個電視節目，等班富二代上去分享個人愛好及生活經歷，再延展探討佢哋嘅內心世界及個人抱負，同埋緩解社會嘅「仇富」情緒。打頭炮做嘉賓嘅係霍英東長孫霍啟剛、莊士集團太子爺莊家彬（Albert）及香港青聯會長葉振都。
三名青聯猛男將於節目訪問中大談青聯嘅趣事，Albert就記起曾經收到一份會員報名申請，報名人原來係參加過「殘酷一叮」節目嘅「拉丁霍啟剛」，佢即時笑笑口話要畀呢個人入會喎。Albert又話，與不同背景嘅青聯成員籌備活動，就好似返到大學年代一樣。至於葉振都就話，青聯嘅「導師計劃」可以提供寶貴意見畀一啲欠缺交際經驗嘅大學生。