政情：施榮忻當機立斷轉奶粉
深受本港媽咪追捧嘅日本明治「大仔奶粉」，日前被驗出含放射性物質，有畀仔女食開嘅父母當堂嚇到鼻哥窿都冇肉，原來當中有唔少名人家長中招。百仁基金主席施榮忻（Jaime）個十五月大嘅細女都係食呢隻牌子奶粉，佢一聽到新聞後真係晴天霹靂，隨即檢查屋企存貨嘅生產序號，幸好唔係受污染嗰批，但為穩陣起見都即時停食呢隻奶粉。
Jaime話，佢每次幫囡囡入貨都係一箱箱咁買，咁啱前日發覺奶粉存量所剩無幾，準備再入貨之際，就聽到啲奶粉出事，好彩出事嘅批次唔係佢囡囡食開嗰批，否則就大件事喇。佢話依家轉用美國品牌嘅奶粉，雖然囡囡可能會有唔適應，但咁啱囡囡現正開始食糊仔，所以應該問題唔大嘅。至於佢會否帶囡囡去驗身？Jaime就話要就此事掌握多啲資訊先至作決定喎。