廣東省同香港關係非比尋常，人流交往十分頻繁，如果你有必要穿梭兩地，有乜嘢事項必須特別注意嘅呢？首先，功夫茶奉勸大家小心過馬路，事關佛山十八路人見死不救事件震驚全國，閣下一個唔覺意成為車禍受害者，隨時小命不保。其次咯喎，飲飲食食都要格外留神，乜鬼嘢坑渠油呀，乜鬼嘢瘦肉精呀，黑心食品之多簡直令人不寒而慄。
好嘞，假設你過馬路無驚無險到終點，飲飲食食又僥倖逃過鬼門關，飽暖會唔會思淫慾呀？如果答案係肯定嘅，功夫茶又要提提你，千祈記住做好防禦措施，因為廣東現已躋身於「梅毒大省」之列。
即係咁，廣東係梅毒發病率極高嘅重災區，所有人與人之間嘅超友誼關係都有可能傳播性病，你都咪話唔得人驚！
根據廣東省性病防治中心主任楊斌所講，廣東連續八年以來梅毒發病病例都以百分之十五至二十嘅幅度飆升，今年截至十月已經超過四萬例，梅毒嘅廣泛流行與傳播已經成為廣東嚴重公共衞生問題。
當然啦，性工作者以及男男同性戀都係高危一族，部分低檔次風月場所性工作者梅毒感染率高達百分之二十五至三十。至於男男同性戀，梅毒發病率係百分之六至二十八。
更加令人擔心嘅係，梅毒同時喺普通人群擴散。經過抽查發現，每一千名育齡婦女之中就有三至五名感染梅毒，有人不知情之下誕下先天梅毒兒。唔好以為老人家就冇事，近年六十歲以上長者感染梅毒嘅病例增長速度比普通人群更加快，去年達到九千多例。專家估計，問題同長者使用安全套比率較低有關。
講咗咁耐，功夫茶其實最想講一句，唔該中國政府切切實實做好防疫措施，千祈唔好又死瞞爛瞞企圖掩飾真相。你知啦，偉大祖國最鍾意就係凡事都列作國家機密，豆腐渣不准過問，愛滋病嚴禁關注，一旦想話去伸冤上訪維護人權，執法人員馬上兇神惡煞又拉又鎖。
廣東省嘅梅毒病例到底係咪四萬？不如咁講啦，數字只會更多不會更少，畢竟報喜不報憂係內地官僚一向慣技。
其實，防範梅毒同防範其他疫症係一樣嘅，一隱瞞就出事，一出事就大鑊。記唔記得○三年沙士瘟疫蔓延時，點解中國同香港特別死得人多呀？咪就係因為事發之初內地官僚秘而不宣囉。
既然廣東變成梅毒大省，香港亦有必要防患於未然。喂，疫魔無疆界，而且梅毒肯定係百分百交叉感染人傳人，食衞局、醫管局同衞生署係咪應該打醒十二分精神呀？總而言之，廣東梅毒病例多，香港嚴防勿囉囌！